الیکشن آتے ہی لوگوں کو ذاتوں کی یاد ستانے لگتی ہے

امت شاہ کے دلت کے یہاں کھانا کھانے کی خبر پر اکھلیش یادو نے چٹکی لی

لکھنؤ۔ ۳۱؍مئی: (ایجنسی) اترپردیش کے وزیر اعلی اکھلیش یادو نے بھارتیہ جنتا پارٹی (بی جے پی) صدر امت شاہ کے وارانسی میں ایک دلت کے ساتھ کھانا کھانے سے متعلق آئی خبروں پر چٹکی لیتے ہوئے آج کہا کہ الیکشن آتے ہی لوگوں کو ذاتوں کی یاد ستانے لگتی ہے۔ مسٹر یادو نے کانگریس نائب صدر راہل گاندھی کا نام لئے بغیر آج یہاں کہا، "گزشتہ انتخابات میں کچھ لوگ دلتوں کے یہاں صرف کھاتے ہی نہیں تھے بلکہ نہاتے بھی تھے۔ یہ تو تب بند ہوا جب میڈیا نے منرل واٹر کی بوتلیں اور



نئے برتن دکھا دیے تھے۔ پھر انتخابات آ گیا ہے، کچھ لوگ پھر دلت کے یہاں کھانے کا ڈھنڈورا پیٹنے میں لگ گئے ہیں۔وزیر اعلی نے کہا کہ عوام سب سمجھتی ہے۔ پہلے جن لوگوں نے اس طرح کی دعوتیں کھائی تھیں، عوام نے انہیں درست جواب دے دیا۔ موقع آنے پر اب جو لوگ کھا رہے ہیں انہیں بھی جواب مل جائے گا۔ انہوں نے کہا کہ ترقی مستقل مسئلہ ہے۔ انتخابی سیاست اسی کے آس پاس ہونی چاہئے۔ ایس پی ترقی کے موضوع پر الیکشن لڑے گی کیونکہ ان کی حکومت نے عوام کی خواہشات کو پورا کرنے کی کوشش کی ہے۔ انہیں یقین ہے کہ عوام حمایت دے گی اور 2017 میں ایس پی پھر حکومت بنائے گی۔